Mae Sioned Gwen Davies yn wreiddiol o Fae Colwyn ond bellach wedi ymgartrefu yn Glasgow. Astudiodd yn y Stiwdio Opera Genedlaethol ac Ysgol Gerdd a Drama’r Guildhall trwy gefnogaeth hael Opera Glyndebourne a ddarparodd iddi Wobr Datblygu Artist Ifanc, a Gwobr Datblygu Gyrfa Sefydliad Bryn Terfel. Sioned oedd cynrychiolydd Cymru yng nghystadleaeth BBC Canwr y Byd, Caerdydd 2017.
Mae Sioned ar y funud yn ymarfer opera newydd sbon yn y Gymraeg gyda cwmni Opra Cymru sef ‘Peth bach ‘di Cawr!’ Mae’r opera gan Gareth Glyn, Patrick Young ac Iwan Teifion Davies wedi ei seilio ar stori’r Mabinogi, Culhwch ac Olwen. Mae Sioned yn canu rhan Olwen a mi fydd yr opera yn teithio drwy Gymru yn yr Hydref.
Yn ddiweddar mae Sioned wedi bod yn brysur yn dirprwyo rhan Carmen i gwmni Opera’r Alban, mi ganodd y rhan ym mherfformiadau ‘Access’ y cwmni gyda’r gerddorfa yn Glasgow, Caeredin, Inverness ac Aberdeen. Yn gynharach yn y flwyddyn mi ganodd rannau La Badessa a La Ciesca, hefyd i gwmni Opera’r Alban yn y casgliad o operau byrion Il Trittico gan Puccini wedi ei gyfarwyddo gan Syr David McVicar. Yn ogystal, mi berfformiodd Sioned ran The Seal Woman yn yr opera o’r un enw gan Granville Bantock a Marjory Kennedy-Fraser. Dyma’r tro cyntaf i’r opera hon gael ei pherfformio ers dros 80 o flynyddoedd. Fe aeth yr opera ar daith i Irvine, West Kilbride, Caeredin a hefyd Gwŷl y Celfyddydau yn Perth.
Ymunodd ag Opera’r Alban yn 2013 er mwyn perfformio rhan Kate mewn taith genedlaethol o The Pirates of Penzance a daeth yn Artist sy’n dod i Amlygrwydd yn ystod 2013/14 gydag Opera'r Alban gan berfformio rhannau Eduige yn Rodelinda Handel a’r Drydedd Wrach ym Macbeth, Verdi ar gyfer y Cwmni. Ers hynny mae Sioned wedi ymddangos nifer o weithiau yn y cynhyrchaidau canlynol - Rusalka, Eugene Onegin, The Mikado, Flight, Rigoletto, The Magic Flute, The Gondoliers.
Mi wnaeth Sioned ei hymddangosiad cyntaf gyda Cwmni Cenedlaethol Lloegr yn y rhan Pitti-Sing, The Mikado. Mae hi hefyd wedi perfformio gyda Cwmni Opera Longborough, West Green House, Opera Valladolid a wedi bod yn rhan o Wŷl Lammermuir yn yr Alban. Perfformiodd y brif ran yn Carmen Bizet mewn addasiad Cymraeg gan Opera Cymru yn yr Eisteddfod Genedlaethol yn 2015. Perfformiodd ran Margarida yn The Yellow Sofa ar gyfer Prosiect Jerwood Opera Glyndebourne ac hefyd ar daith yr hydref yn ystod 2012, gan ddychwelyd unwaith eto yn 2014 er mwyn dirprwyo rhannau Olga yn Eugene Onegin ac Annina yn La traviata.
Mae wedi cael llwyddiant mewn nifer o gystadlaethau yn cynnwys y wobr gyntaf yn Eisteddfod Ryngwladol Llangollen yn 2009, y wobr gyntaf yn Eisteddfod Genedlaethol 2009 a dyfarnwyd iddi wobr y perfformiwr mwyaf trawiadol yng Ngwyl Gogledd Llundain 2009. Yn ogystal mae wedi cyrraedd y rownd gynderfynol Gwobrau Kathleen Ferrier a rownd derfynol Gwobrau Lleisiol The Jackdaws Great, Gwobr Thelma King, MOCSA a chystadlaethau Canwr Cymreig Ifanc Cymry Llundain.
Mae ei huchafbwyntiau mewn cyngherddau yn cynnwys taith i Malta gyda’r cwmni Siambr La Serenissima, Voices, Henze yn Neuadd y Barbican, Llundain, yr unawd Alto yn Les Noces, Stravinsky yn yr LSO St. Luc, Llundain, Messiah, Handel gyda Chôr siambr Lund yn Sweden a Serenade to Music Vaughan Williams i gyfeiliant Graham Johnson. Perfformiodd yn yr Arddangosiad o leisiau Cymru Brynfest Bryn Terfel yng Nghanolfan y Southbank, Llundain a chael y fraint hefyd o ganu mewn cyngerdd ym mhresenoldeb ei Uchelder Brenhinol, Tywysog Cymru yng Nghastell Caerffili. Yn ddiweddar mae wedi perfformio’r unawd mezzo-soprano yn y perfformiad cyntaf yn unrhyw le yn y byd o’r gwaith newydd, Arctic Elegy gan Edward Andrew Jones yn Aberdeen. Yn ogystal mae wedi bod ar daith cyngherddau gyda Siambr o Gymru, Ensemble Cymru.
